देशका विभिन्न स्थानमा भएको सवारी दुर्घटनामा दुई जनाको मृत्यु भएको छ । रौतहट, मौलापुर नगरपालिका-३ नैलाखा गेटस्थित सडकमा ग.१० प ९५८ नम्बरको मोटरसाइकल अनियन्त्रित भई दुर्घटना हुँदा चालक सोही नगरपालिका-६ पथराबुधराम बस्ने ३२ वर्षीय कृष्ण नन्दन रामको मृत्यु भएको छ ।

बुधबार राति दुर्घटना हुँदा गम्भीर घाइते भएका उनको बारास्थित एलएस न्यूरोमा उपचारको क्रममा बिहीबार बिहान मृत्यु भएको हो । त्यस्तै उदयपुर, उदयपुरगढी गाउँपालिका-२ स्थित सडकमा केर्सेबाट ताप्लीतर्फ जाँदै गरेको प्र.१-०२-००२ त ९६१ नम्बरको ट्याक्टर अनियन्त्रित भई सडकबाट करिब ५० मिटर तल खसेर बिहीबार बिहान दुर्घटना हुँदा चालक भोजपुर हतुवागढी गाउँपालिका-२ बस्ने १९ वर्षीय निरज मगरको घटनास्थलमै मृत्यु भएको छ ।

साथै दुर्घटनामा घाइते भएका सहचालकलाई उपचारको लागि कटारी अस्पताल उदयपुर पठाइएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।