भद्रपुरमा मेची पुल निर्माणका लागि नागरिकबाट सङ्कलन गरिएको चन्दा रकम तत्कालीन राजालाई दिने पञ्चायती शासकको निर्णयविरुद्ध संघर्षमा उत्रिदा जेल परेका यहाँका दुई राजनीतिक योद्धालाई नागरिक सम्मान गरिने भएको छ ।
विर्तामोडको जय नेपाल प्रतिभा प्रोत्साहन प्रतिष्ठानले मेचीनगर नगरपालिका-९ का याम भण्डारी र भद्रपुर नगरपालिका-८ का दिव्य भूर्तेललाई रु एक लाख एक हजार नगदसहितको पूर्ण–टुंग आदर्श नागरिक सम्मान प्रदान गर्ने निर्णय गरेको प्रतिष्ठानका अध्यक्ष गोपालकुमार बस्नेतले बताउनुभयो ।
विसंं २०२८ मा भद्रपुरका नागरिकले मेची पुल निर्माणका लागि रु २५ लाख चन्दा सङ्कलन गरेका थिए । सो रकम पुल नबन्दै तत्कालीन अञ्चलाधीश मनमोहन मिश्रलगायत पञ्चायती नेताहरुले तत्कालीन राजा महेन्द्र शाहलाई थैली भेट भन्दै बुझाएका थिए । नागरिकबाट उठेको चन्दा राजालाई दिएको भन्दै आन्दोलन हुँदा भण्डारी र भूर्तेललाई पञ्चायती शासकले पक्राउ गरेर चरम यातनासहित जेल हालेका थिए ।
निरंकुशतन्त्रको विरुद्ध नागरिक अधिकार, लोकतन्त्र वहाली र समाज रुपान्तरणका लागि साहसिक एवम् अतुलनीय संघर्ष गरेको कदरस्वरुप भण्डारी र भूर्तेललाई नागरिक सम्मान प्रदान गर्ने बुधवार प्रतिष्ठानको बैठकले निर्णय गरेको बस्नेतले जानकारी दिनुभयो ।
गत वर्ष यो सम्मान प्रसिद्ध कलाकार द्वय मदनकृष्ण श्रेष्ठ र हरिवंश आचार्य (मह जोडी)लाई प्रदान गरिएको थियो ।
आगामी वैशाख २० गते विर्तामोडमा एक समारोहबीच यस वर्षको सम्मान अर्पण गरिने बस्नेतले बताउनुभयो ।
२०६५ सालमा बन्यो पुल
भद्रपुरमा भारतको गलगलिया जोड्ने मेची पुल निर्माणको इतिहास रोचक छ । विसं २००९ मै भद्रपुरका सूरजमल अग्रवालको संयोजकत्वमा पुल निर्माणका लागि पहिलोपल्ट समिति गठन भएको थियो ।
पुलको तीन पटक शिलान्यास भएको थियो । पहिलो शिलान्यास पञ्चायतकालमै अञ्चलाधीश मिश्रले गरेको थियो भने दोस्रो शिलान्यास विसं २०४१ मा तत्कालीन प्रधानमन्त्री लोकेन्द्रबहादुर चन्दले गर्नुभएको थियो ।
तेस्रोपटक विसं २०६६ मा उपप्रधानमन्त्री विजयकुमार गच्छदारले पुलको शिलान्यास गर्नुभएको थियो । तेस्रो पटकको शिलान्यासपछि रु ३७ करोडको लागतमा पुल निर्माण भएको थियो । उक्त पुलको तत्कालीन प्रधानमन्त्री केपी शर्मा ओलीले विसं २०७५ माघ १७ गते विधिवत् उद्घाटन गर्नुभएको थियो ।
