दिनहुँ प्रदर्शन र नारावाजी हुन थालेपछि जिल्ला प्रशासन कार्यालय, चितवनले भरतपुरको चौबीसकोठीदेखि मालपोतचोकसम्म निषेधित क्षेत्र घोषणा गरेको छ ।

पत्रकार शालिकराम पुडासैनी मृत्यु प्रकरणका विषयमा विभिन्न समूहले आन्दोलन गर्न थालेपछि दैनिक क्रियाकलाप असहज बनेको भन्दै प्रशासनले निषेधित क्षेत्र घोषणा गरेको हो । चितवनका प्रहरी प्रमुख (एसपी) दानबहादुर मल्लले आजदेखि जिल्लाको सुरक्षा व्यवस्था थप कडा बनाइएको जानकारी दिए । ‘आन्दोलनले यहाँको दैनिक प्रशासनिक कामकाज नै प्रभावित बनायो त्यसैले सुरक्षा व्यवस्था कडा पारेका हौ।’ उनले भने।

पत्रकार पुडासैनी गत साउन २० गते चितवनको कंगारु होटलमा झुण्डिएको अवस्थामा भेटिएका थिए । घटनाको अनुसन्धानका लागि पत्रकारहरु रवि लामिछानेसहितलाई पक्राउ गरेपछि उनका समर्थकहरुले विगत ४ दिनदेखि लगातार प्रदर्शन गर्दै आएका छन्। उनीहरुमाथि ५ दिनको म्याद थप गरि अनुसन्धान भइरहेको छ ।