आफ्नै स्कुलको बसले किचेर एक विद्यार्थीको मृत्यु भएको छ। ललितपुरको गोदावरी नगरपालिका वडानम्बर ९ मा छम्पीस्थित होली टेम्पल विद्यालयको बसले किच्दा एलकेजीमा अध्ययनरत आठ वर्षीय नवीन घिमिरेको मृत्यु भएको हो।

छम्पीस्थित होली टेम्पल विद्यालयको बा २ ख ५००९ नम्बरको बसले मंगलबार बिहान करिब सवा ९ बजेतिर किचेर सोही विद्यालयका विद्यार्थी घिमिरेको घटनास्थलमै मृत्यु भएको महानगरीय प्रहरी परिसर ललितपुरले जनाएको छ। घिमिरेले एलकेजीमा पढ्दथे। विद्यालय जाने क्रममा उनी बस चढेलगत्तै ढोकाबाट खसेको र सोही बसको पछाडिको पांग्राले किचेको प्रत्यक्षदर्शीले बताएका छन्।

चालक र बसलाई स्थानीय प्रहरीले नियन्त्रणमा लिएको छ। घटनापछि स्थानीयले केहीबेर सडक अवरुद्ध गरेका थिए। अहिले स्थिति नियन्त्रणमा आइसकेको र घटनाबारे अनुसन्धान भइरहेको प्रहरीले जनाएको छ।