भारतको एक धार्मिक आश्रममा बली दिन लागिएकी एक नेपाली युवती बच्न सफल भएकी छन् । नेपाली युवतीलाई भारतमा लगेर बली दिन लागिएको कुरा थाहा पाएको प्रहरीले उनीहरुको योजना विफल तुल्याएको छ ।
आफूलाई भारत लैजाँदै गरेको कुरामा युवतीले शुरुमै शंका लागेर प्रहरीको सहयोग लिएका कारण बलि दिने योजना विफल बन्न पुगेको प्रहरी स्रोतले जानकारी दिएको छ । तर, प्रहरीले घटनाका बारेमा भोलि ९बिहीबार० मात्र पत्रकार सम्मेलनमार्फत आधिकारिक जानकारी दिने तयारी गरिरहेको छ । प्रहरीले युवतीलाई बली दिन भारत लैजाने कार्यमा संलग्न रहेको आरोपमा सात जनालाई पक्राउ गरेको छ ।
पक्राउ पर्नेमा दुई महिला र पाँच जना पुरूष रहेको परिसर काठमाडौंका डीएसपी होविन्द्र बोगटीले पुष्टि गरेका छन् । उनले अनुसन्धान जारी रहेको जानकारी दिएका छन् ।
बलीका लागि यसरी खोजियो युवती
भारतमा बली दिने युवती खोजीका लागि अनौठो शैली अपनाइएको पाइएको छ । जसका लागि केही समयअघि काठमाडौंमा एक ‘र्याम्प शो’ गर्ने भन्दै अग्ला कदका युवतीको खोजी गरियो । काठमाडौंमा एक महिलाले त्यसको संयोजन गरिन् ।
राजधानीको एक फेसन डिजाइन हाउसले ती महिलाले खोजेअनुसारकी युवती उपलब्ध गराउने जिम्मा लिएको थियो । जसमा युवतीको उचाई साढे ५ फिटदेखि ६ फिटसम्म भनिएको थियो ।
डिजाइन हाउसले सोही मापदण्ड अनुसार युवतीको खोजी थाल्यो । खोजी गर्ने क्रममा एक युवती सम्पर्कमा आइन् । काठमाडौंमा उनको शरीरको नाप लिइयो । शुरुमा काठमाडौंमै कार्यक्रमका लागि भन्दै युवतीलाई तयार गरिए पनि केही दिनपछि विराटनगरमा कार्यक्रम गर्ने भनियो ।
त्यसपछि नै ती युवतीले शंका लागेर आफूहरुलाई खबर गरेको प्रहरी स्रोतले जनाएको छ । युवतीको प्रारम्भिक शंकाका आधारमा प्रहरीले सुक्ष्म उनीहरुमाथि निगरानी र अनुसन्धान अगाडि बढायो । घटना अनुसन्धानका क्रममा कतिपय स्थानमा प्रहरी युवतीसँगै सादा पोशाकका आफन्त बनेर शंकास्पद व्यक्तिसम्म पुगेको स्रोतले जनाएको छ । स्रोत भन्छ, ‘युवती मोडल समेत भएकाले अनुसन्धानमा केहि सजिलो भयो ।’
उनलाई आफ्नो प्रस्तुती देखाएवापत् उचित पारिश्रमिक दिने जनाइएको थियो । आपसी सहमतिमा सबै कुरा मिलिसकेपछि ती युवती विराटनगर जान तयार भइन् । जहाँ सादा पोशाकमा रहेका प्रहरी पनि सँगै थिए ।
विराटनगर पुगेपछि उनलाई एक धार्मिक आश्रममा लगिएको उच्च प्रहरी स्रोत बताउँछ । त्यहाँ पुगेपछि उनलाई विभिन्न धार्मिक बस्त्र लगाउन लगाइयो । उनको खुट्टामा कालो धागो बाँधियो । उनलाई फेरि भारत जानुपर्ने बताइएपछि प्रहरीले सात जनालाई नियन्त्रणमा लिएर अनुसन्धान थालेको थियो । प्रहरीको प्रारम्भिक अनुसन्धानबाट भारत लगेर ती युवतीलाई बली चढाउने योजना रहेको बढी आशंका छ ।
विराटनगर पुर्याइएकी युवतीलाई राखिएको कोठामा अर्की एक महिला पनि रहेको प्रहरी स्रोतले जनाएको छ । जो ती युवतीसँगै काठमाडौंबाट गएकी थिइन् ।
एक अधिकारीका अनुसार ती युवतीलाई विराटनगरबाट भारतमा रहेका एकजना धार्मिक बाबाको आश्रममा पुर्याउने योजना रहेको प्रारम्भिक अनुसन्धानमा देखिएको छ । प्रहरीले घटनाबारे जानकारी पाएपछि काठमाडौं र स्थानीय प्रहरीको समवन्यमा घटनामा संलग्न रहेको आरोपमा सात जनालाई पक्राउ गरेको हो । जसमा श्रीमान–श्रीमती समेत रहेको स्रोतको दावी छ ।
