सत्तारुढ नेकपाको सचिवालय बैठकले उपसभामुख शिबमाया तुम्बाहाङ्फेलाई राजीनामा दिन भने पनि उनले भने राजीनामा नदिने स्पष्ट पारेकी छन् । उनले भनिन्,‘मैले व्यवस्थापिकालाई शून्यतामा छोडेर राजीनामा दिन मिल्दैन । उपसभामुखलाई पार्टीले निर्देशन दिन पनि मिल्दैन । त्यसैले म आफ्नो काममा खटिइ रहनेछु । ’
उनले नेकपाको हिजोको निर्णयबारेमा आफूले औपचारिक रुपमा पत्र पाइनसकेको जनाउँदै त्यस्तो पत्र आएमा परिमार्जन गर्न लगाउने उल्लेख गरिन् । कतिपय नेताले महाअभियोग लगाउन सक्ने खालको चेतावनी मिडियामार्फत दिएको प्रसंगमा जिज्ञासा राख्दा उनको भनाइ थियो,‘सक्छन् भने महाअभियोग लगाउन् । मलाई कुनै चिन्ता छैन ।’
उनले तत्कालीन सभामुख कृष्णबहादुर महरालाई आफुले यौन काण्डमा फस्न नपठाएको फेरि पनि दोहोर्याउँदै उनले गरेको गल्तीको सजाय आफूले बेहोर्न नसक्नेसमेत जनाइन् ।
उनले सभामुख पद यति लामो समयदेखि खालि हुँदा पनि दलहरुले कुनै चासो नदिएकोमा चिन्ता व्यक्त गर्दै उनले भनिन्,‘पहिला बहुमत भएको दलले सभामुखको उम्मेदवार अगाडि ल्याओस् त्यसपछि के गर्ने हो गरुम्ला ।’
नेकपासँग अहिले दुई तिहाई बहुमत नभएकोले महाअभियोग लगाउन सक्ने परिस्थिति छैन ।
