झापा विर्तामोडस्थित बी एन्ड सी मेडिकल कलेजका सञ्चालक दुर्गा प्रसाईं महानगरीय प्रहरी परिसर भक्तपुरको खोजी सूचीमा छन् । जिल्ला प्रशासन कार्यालय भक्तपुरले प्रसाईंलाई पक्राउ गर्न अनुमति दिएसँगै उनी फरार भएका हुन् ।
२० करोड घूस मागेको आरोप लगाएपछि प्रसाईंविरुद्ध चिकित्सा शिक्षा आयोगका उपाध्यक्ष डा श्रीकृष्ण गिरीले मानहानीको मुद्दा हालेका थिए। प्रसाईंले आफूविरुद्ध अभद्र व्यवहार, गाली बेइज्जती तथा मानहानी गरेको भन्दै महानगरीय प्रहरी परिसर भक्तपुरमा बुधबार चिकित्सा शिक्षा आयोगका उपाध्यक्ष श्रीकृष्ण गिरीले उजुरी दिएका हुन्।
अनुमति पाएलगत्तै प्रहरी प्रसाईंको भक्तपुरस्थित निकोसेरा नजिकको निवासमा पुगेको थियो। तर उनी घरमा नभेटिएको प्रहरीको भनाइ छ। महानगरीय प्रहरी परिसर भक्तपुर प्रमुख सविन प्रधानले प्रसाईंंविरुद्ध पक्राउ पुर्जी जारी भएको र उनलाई पक्राउ गर्न झापा प्रहरीलाई पनि सम्पर्क गरेको तर त्यहाँ नभेटिएको भन्ने खबर आएको बताए । ‘हामी खोज्दै छौं, उनको मोबाइलको स्विच पनि अफ छ’, –उनले भने ।
प्रधानका अनुसार अभद्रकै मुद्दामा जिल्ला प्रशासन कार्यालय भक्तपुरबाट पक्राउ गर्ने अनुमति लिइएको हो। प्रसाईंले मंगलवार काठमाडौंमा पत्रकार सम्मेलन गर्दै मेडिकल कलेजको सम्बन्धनका लागि गिरीले आफूसँग २० करोड घूस मागेको दाबी गरेका थिए।
प्रसाईंले डा। गिरीविरुद्ध सम्पत्ति शुद्धीकरण अनुसन्धान विभाग र अख्तियार दुरुपयोग अनुसन्धान आयोगमा उजुरीसमेत दिएका थिए । गिरीले प्रसाईंको आरोप खण्डन गर्दै मंगलबार काठमाडौं जिल्ला अदालतमा गाली बेइज्जती तथा मानहानीको मुद्दासमेत दर्ता गरेका थिए।
