पाँच दिनपछि उनको विवाह हुँदै थियो । घरमा सामान जुटाउने र निम्तो बाँड्ने चटारो थियो । आफ्नो बिहेको निम्तो साथीहरुलाई दिन रमिता भट्ट कञ्चनपुर महेन्द्रनगरको जनज्योति टोल गएकी थिइन् । रमिताले साथीहरुलाई निम्तो त बाँडिन्, तर बिहे हुन पाएन ।

निम्तो बाँडेर महेन्द्रनगर बजारतर्फ फर्किरहेकी उनको बिहीबार साँझ टिपरको ठक्करबाट मृत्यु भयो । बैतडीको दशरथचन्द नगरपालिका–१ गुरुखोला घर भएकी रमिता महेन्द्रनगरकै जनज्योति बहुमुखी क्याम्पसमा स्नातक तहमा अध्ययनरत थिइन् ।

उनी डेढ वर्षअघि गुरुखोलाकै प्रकाशबहादुर टेरसँग भागेर आएकी थिइन् । टेरसँगै बसिरहेकी उनलाई अन्तरजातीय सम्बन्ध भएकाले माइतीपक्षले स्वीकार गरेको थिएन । अहिले माइती पक्ष राजी भएपछि रमिता र प्रकाशको औपचारिक विवाह हुन लागेको थियो ।

‘माघ १३ गते विवाहको तयारी थियो, हामीहरु सरसमान जुटाउनेदेखि निम्तो बाँड्ने काममा जुटेका थियौँ,’ रमिताका ससुरा हरिसिंह टेरले फोनमा भने, ‘खबर सुनेपछि सबै भताभुङ्ग भयो ।’ उनी छोरा प्रकाश र परिवारका अन्य सदस्यसहित महेन्द्रनगर आइरहेका छन् । रमिता दिउँसो २ बजेतिर साथीहरुलाई कार्ड दिन्छु भन्दै डेराबाट निस्केकी थिइन् । आजको कान्तिपुर दैनिकमा समाचार छ ।