नेपाल कम्युनिष्ट पार्टी (नेकपा) का अध्यक्ष केपी शर्मा ओलीले आफूहरुविरुद्ध एकोहोरो रुपमा प्रचार युद्ध छेडिएको बताएका छन् ।
नेकपाको जारी केन्द्रीय कमिटीको बैठकलाई सम्बोधन गर्दै उनले यो प्रचार युद्धलाई आक्रमण र तीव्र बनाउने केहि शक्तिहरु लागिरहेको उनले बताए ।
उनले भने, ‘कमरेडहरु ! हाम्राविरुद्ध प्रचार आक्रमण तीव्र रुपमा छेडिएको छ । युद्ध त दुईतिरबाट हुन्छ । यहाँ त आक्रमण मात्रै भएको छ । हामी विवादबाट होइन । हाम्रा उपलब्धिबाट र नतिजाबाट जवाफ दिन्छौं ।’
उनले लोकतन्त्रप्रति आफूहरुको निष्ठामा प्रश्न उठाइएको बताउँदै भने, ‘हाम्रो पार्टीको नामको कारणले कतिमा वैचारिक पूर्वाग्रह हुन सक्छ । हामी वैचारिक आग्रह पूर्वाग्रहभन्दा माथि उठ्नु पर्छ ।’ उनले यो सरकार देशको आर्थिक समृद्धिमा लागेको र कसैलाई सडकमा अलपत्र र भोकै बस्ने अवस्था आउन नदिन सक्रिय रहेको बताएका छन् ।
संविधान जारी भएपछि भएको संसदीय निर्वाचन पछिका २ वर्षमा असाधारण उपलब्धि हासिल गरेको पनि ओलीले दाबी गरे । ‘निर्वाचन भन्दा पछि यो २ वर्षमा असाधारण उपलब्धि हासिल गरेका छौं,’ ओलीले भने ।
प्रधानमन्त्री ओलीले संविधान कार्यान्वयनको सन्दर्भमा अत्यन्त महत्वपूर्ण उपलव्धि हासिल गरिएको पनि दाबी गरे ।
