मकवानपुरको हेटौंडा उपमहानगरपालिका–११ की अजिता भुजेलको हत्यामा संलग्न ५ जनालाई प्रहरीले पक्राउ गरी सार्वजनिक गरेको छ ।
पक्राउ पर्नेहरुमा हेटौंडा उपमहानगरपालिका–११ कै २० वर्षीया एलिसा पाख्रिन, हेटौंडा–४ का २५ वर्षीय सुशील थापा मगर, २४ वर्षीय शाशिष बल, २१ वर्षीय बुद्ध लामा र हेटौंडा–९ का १८ वर्षीय सिमोन परियार छन् ।
अजिताको बलात्कारपछि हत्या भएको १५ औं दिनपछि प्रहरीले हत्यामा संलग्न पाँच जनालाई पत्रकार सम्मेलन मार्फत सार्वजनिक गरेको हो ।
अजिताको शव गत माघ ४ गते बिहान हेटौंडाको क्याम्पडाँडामा अर्धनग्न अवस्थामा फेला परेको थियो ।
प्रहरीका अनुसार सात हजार रुपैयाँ दिने सहमतिमा यौनसम्पर्क राखे पनि पछि पैसाको निहुँमा विवाद उत्पन्न भएको थियो । विवाद बढ्दै गएपछि उनीहरूले अजितालाई ट्रकभित्र बिजुलीको तारले घाँटी अठ्याएर हत्या गरेको अनुसन्धानबाट खुलेको हो ।
उनीहरूले थानाभञ्याङमा ना ६ ख ६५२७ नम्बरको ट्रकभित्र भुजेलको हत्या गरेर क्याम्पाडाँडामा लगेर फालेको अनुसन्धानबाट खुल्न आएको छ ।
प्रहरीका अनुसार घटनामा संलग्न २ जना अझै फरार रहेका छन् । घटनाको थप अनुसन्धान भइरहेको प्रहरीले जनाएको छ । अजिता तेस्रो लिङ्गी भएको प्रहरीले जनाएको छ ।
