प्रमुख प्रतिपक्ष नेपाली कांग्रेसका नेता गगन थापाले बालुवाटार स्थित ललिता निवास जग्गा प्रकरलाई व्यंग्य गर्दै स्वस्थानी ब्रत शैलीमा कथा सुनाएका छन् । प्रतिनिधिसभाको मंगलबार बसेको बैठकमा अख्तियार दुरुपयोग अनुसन्धान आयोगको कदमलाई लिएर ब्यंग्य गरेका हुन् ।

उनले संसदमा भने, ‘कुमारजी आज्ञा गर्नुहुन्छ हे विष्णुमणि अब उप्रान्त कसैको चोरीको सामान किन्दा सकेसम्म लोकलाई थाहा नहुने गरी किन्नु । थाहा पाइहाले होइन, होइन भन्नु । चित्त बुझाउन नसकेर अप्ठ्यरोमा पर्ने भए हत्तपत्त चोरीको सामान फर्काउनु र दुई पटक विष्णु, विष्णु भन्नु । त्यसमा पनि लोकले चित्त बुझाएनन् भने गोकुलधाममा गएर खड्ग उचाल्नु र चार पटक विष्णु, विष्णु भन्नु । त्यसको प्रभावले तिम्रो र हाम्रो अनुहारमा लागेको दाग लोकले देखे पनि, देख्नुपर्नेले देख्ने छैनन् । इतिश्री अख्तियार पुराणे, कुमार विष्णु संवादे, श्री स्वस्थानी व्रतकथाय बालुवाटार प्रकरण वर्णनम् प्रथमोध्याय ।’