नेपाली बजारमा आज सुनको मूल्य एकैपटक तोलामा १५ सयले वृद्धि भएर प्रतितोला ८० हजार ३ सय रुपैयाँ पुगेको छ ।
आइतवार प्रतितोला छापावाला सुनको मूल्य ७८ हजार ८ सय प्रतितोला रहेको थियो भने आज एक्कासी सुनको मूल्यमा १५ सय रुपैयाँले वृद्धि भइ प्रतितोला ८० हजार ३ सय कायम भएको नेपाल सुन चाँदी व्यवसायी महासंघले जनाएको छ । त्यस्तै आज तेजावी सुनको मूल्य प्रतितोला ८० हजार कायम भएको छ । यो मूल्य अहिलेसम्मकै उच्च हो ।
त्यस्तै आज चाँदीको मूल्य पनि तोलामा ५ रुपैयाँले वृद्धि भएको छ । आइतवार प्रतितोला चाँदीको मूल्य ९ सय २० रहेको थियो भने आज मूल्य वृद्धि भइ प्रतितोला चाँदी ९ सय २५ कायम भइ कारोवार भइरहेको महासंघले जनाएको छ । महासंघका अनुसार शक्ति राष्ट्र चीनमा फैलिएको महामारी अर्थात् कोरोनाको कारण विश्व बजारमा परेको असरका कारण पनि सुन तथा चाँदीको मूल्यमा वृद्धि भएको हो ।
