प्रहरी हिरासतमै एक अश्वेत व्यक्तिको मृत्यु भएपछि अमेरिकाको मिनेशोटामा तनाव उत्पन्न भएको छ । जर्ज फ्लोइडको प्रहरी हिरासतमै मृत्यु भएपछि मिनेशोटामा सोमबारदेखि जारी प्रदर्शनले हिंसात्मक रूप लिएको छ ।
ब्यापक मात्रा प्रहरी परिचालन गरिए पनि प्रदर्शनकारीहरूले आगजनी, ढुंगामुडा र तोडफोड रोकेका छैनन् । हिंसात्मक रुप लिएपछि अमेरिकाको मिनेशोटाका गर्भनरले त्यसको निन्दा गरेका छन् । मिनेशोटासहित अमेरिकाका विभिन्न क्षेत्रमा फ्लोइडको निधनपछि विरोध प्रदर्शन भइरहेका छन् ।
राज्यका गभर्नर टिम वाल्जले प्रदर्शन फ्लोइडको हत्याको विरोधमा मात्रै सीमित नरहेको बताएका छन् । फ्लोइडको हत्या आरोपमा मिनियापोलस प्रहरीका एक अधिकारीलाई पक्राउ गरी अभियोग दर्ता भएको छ तर पनि प्रदर्शन रोकिएको छैन ।
गएको सोमबार ती प्रहरी अधिकारीले ४६ वर्षका फ्लोइडलाई पक्राउ गर्ने क्रममा उनको घाँटीमा घुँडाले थिचेका भिडियो भाइरल भएको थियो ।
