नेपालमा आज (बिहीवार) एकैपटक २५० जनामा कोरोना संक्रमण पुष्टि भएको छ । योसँगै नेपालमा कुल कोरोना संक्रमितको संख्या ४ हजार ६१४ पुगेको छ ।
स्वास्थ्य मन्त्रालयको नियमित मिडिया ब्रिफिङमा मन्त्रालयका प्रवक्ता प्रा। डाक्टर जागेश्वर गौतमले नेपालमा आज एकैपटक २५० जनामा कोरोना संक्रमण पुष्टि भएको जानकारी दिए । मन्त्रालयका अनुसार आज भेटिएका कोरोना संक्रमितको स्वास्थ्य अवस्था सामान्य रहेको छ भने उनीहरु चिकित्सकको निगरानीमा रहेका छन् ।
यसैबीच नेपालमा अहिलेसम्म कोरोना भाइरसको महामारीका कारण मृत्यु भएकाको कुल संख्या १५ रहेको छ भने स्वास्थ्योपचार पछि निको भएकाको संख्या ८६१ पुगेको छ ।
आज मात्रै नेपालमा थप १८७ जनाले कोरोनाविरुद्धको लडाई जितेर घर फर्किएका छन् । नेपालमा हिजो (बुधवार) एकैपटक २७९ जनामा संक्रमण पुष्टि भएको थियो ।
