राष्ट्रिय प्रजातन्त्र पार्टी (राप्रपा)का ३१ नेताले संयुक्त राजीनामा दिएका छन् । पूर्वमन्त्री सुनिलबहादुर थापासहित ३१ नेताले राप्रपाबाट संयुक्त राजीनामा दिएका हुन् । शनिबार पार्टीका अध्यक्षत्रयलाई पत्र लेख्दै सुनिल, विष्णुविक्रम थापा, बाबुराम बस्नेत, बृजलाल यादव, पदमबहादुर बस्नेतसहित ३१ जनाले राजीनामा दिएका हुन् ।

पार्टी एकीकरणपछि पनि नेतृत्वको ढुलमुले दृष्टिकोणले पार्टीमा आकर्षण नबढेको र आफूहरुले पटकपटक ध्यानाकषर्ण गराउँदा पनि जनमत प्रतिकुल अगाडि बढेकाले साथ दिन नसक्ने निष्कर्षमा पुगेको राजीनामा पत्रमा उल्लेख छ ।

थापाका छोरा सुनिल आफ्नो समूहसहित नेपाली कांग्रेस प्रवेश गर्ने तयारीमा छन् । थापालाई कांग्रेसमा पदाधिकारी पद दिने तयारी भएको कांग्रेस उच्च स्रोतले जानकारी दियो ।