नेपाली फिल्मकी कान्छी नम्रता श्रेष्ठ आफूलाई अभिनेत्रीको रुपमा स्थापित गर्न संघर्ष गरिरहेकी छन् । उनले फिल्म ‘गाँठो’ बाट अभिनय करिअर सुरु गरेकी हुन् । तर, उनलाई पहिलो गाँसमै ढुंगा लाग्यो । अर्थात्, समीक्षात्मक र व्यापारिक दुवै रुपमा फिल्म असफल ठहरियो । यसपछि उनले फिल्म ‘जानी नजानी’ मा काम गरिन् । यो फिल्ममा उनी सहायक अभिनेत्रीको रुपमा थिइन् ।
तर, दोस्रो फिल्मले पनि उनलाई सफलताको सुखद दिन सकेन । लगातार दुई फिल्म असफल भएपछि उनी लामो समय कामविहीन भइन् । कतिपयले उनको करिअर संकटमा परेको समेत विश्लेषण गरे । यसैक्रममा उनले फिल्म ‘माछा माछा’ मा काम गर्ने अवसर पाइन् । यो फिल्मबाट उनलाई ठूलो आश थियो । तर, दुर्भाग्य ! फेरि उनी सफलताबाट बन्चित हुनुपर्यो ।
फ्लप फिल्ममा ह्याट्रिक गरेपछि उनलाई मिडियाले ‘अनलक्की नायिका’ भन्न थालेको छ । नम्रतालाई आफ्नो नामले पनि समस्या भइरहेको छ । ‘प्रसाद’ अभिनेत्रीसँग नाम मिल्ने भएकाले धेरैले उनलाई ठूली नम्रता श्रेष्ठ ठान्ने गरेका छन् । जसले गर्दा उनलाई आफ्नो फरक पहिचान बनाउन कठिन भएको छ । उनी स्वयं नाम जुधेका कारण आफूलाई समस्या भएको स्वीकार गर्छिन् ।
पछिल्लो समय अभिनेता नाजिर हुसेनसँग नाम जोडिएपछि चर्चामा रहेकी उनले अचेल आफूलाई फिट राख्न जिममा कडा मिहिनेत गरिरहेकी छन् । उनले जिममा वर्कआउट गरेका तस्विर तथा भिडियोहरु सामाजिक सञ्जालमा पोस्ट गरिरहेकी हुन्छिन्, जसमा उनलाई निकै फिट र स्लिम देख्न सकिन्छ ।
