करिश्मा मानन्धर नेपालकी सदाबहार नायिकाको रुपमा परिचित छिन् । करिश्मा मानन्धर (केसी)क जन्म १९७४ जनवरी ३० मा ललितपुरमा भएको थियो । नेपाली सिने क्षेत्रको सफल अभिनेत्रीको रुपमा परिचित करिश्माले १४ वर्षको उमेरमा फिल्म ‘सन्तान’बाट आफ्नो अभिनय करिअर सुरु गरेकी हुन् । त्यस फिल्ममा उनले भुवन केसीसँग काम गरेकी थिइन् ।उनी नेपाली रजतपटमा सबैभन्दा सुन्दर नायिकाका रूपमा समेत चिनिन्छिन । करिश्मा अहिले फिल्म निर्माणमा समेत सक्रिय छिन् ।

कक्षा आठमा पढिरहेकी बेला उनी सिनेमा क्षेत्रमा प्रवेश गरेकी थिइन् । नेपाली फिल्म क्षेत्रमा सदाबहार अभिनेत्रीको रुपमा परिचित उनको सफल चलचित्रमा ‘कस्तुरी’, ‘ट्रक ड्राइभर’, ‘भाउजु’, ‘एक नम्बरको पाखे’लगायतका रहेका छन् । करिश्माको लक्ष्य भने आफ्नो नामको अगाडि डाक्टर लेखाउनु रहेको छ । ‘कस्तुरी’ चलचित्रमा काम गरेपछि उनले चर्चित चलचित्र निर्देशक बिनोद मानन्धरसँग विवाह गरिन् । विवाह पश्चात् उनी चर्चाको शिखरमा पुगिन् यसै कारण उनलाई करिश्मा केसी भन्दा करिश्मा मानन्धरकै नामले चिनिन्छिन् । उनको एउटी छोरी (कविता मानन्धर) पनि छिन् ।

नेपाली फिल्म क्षेत्रमा निर्माता र अभिनेत्रीको परिचय समेत बनाएकी करिश्माले तीन दशक बढी समय नेपाली कला क्षेत्रमा बिताइसकेकी छन् । त्यस्तै अहिले उनी आफ्नो पुस्तक ‘आत्मकथा’का लागि तयारी गर्दै आएकी छिन् । केही समयअघि राजनीतिमा पनि सक्रिय हुँदै आएकी उनी अहिले राजनीति भन्दा टाढा रहेकी छिन् ।