नेकपा माओवादी केन्द्रबाट उपप्रधानमन्त्रीसहित सरकारमा सहभागी हुन शीर्ष नेताहरुले नै तीब्र चाहना व्यक्त गरेपछि मन्त्री छान्न प्रचण्डलाई थप सकस परेको छ । स्थायी कमिटी सदस्यद्धय नारायणकाजी श्रेष्ठ र कृष्णबहादुर महर दुबैले माओवादी केन्द्रबाट सरकारको नेतृत्व गर्ने दाबी गर्न थालेपछि प्रचण्डले मन्त्री छान्न आजलाई बोलाएको स्थायी कमिटी बैठक नै स्थागित गरे ।

स्थायी कमिटीमा रहेर पनि अहिलेसम्म मन्त्री बन्न नपाएका देवेन्द्र पौडेललाई मन्त्री बनाउन प्रचण्ड सकारात्मा छन् । तर श्रेष्ठ र महराको लडाइँले अर्का स्थायी कमिटी सदस्य देव गुरुङले मन्त्री बन्ने अवसर पाउने वातावरण बनेको माओवादीमा चर्चा छ । श्रेष्ठ र महरालाई रोक्नकै लागि प्रचण्डले प्रधानमन्त्री शेरबहादुर देउवालाई सरकारमा उपप्रधानमन्त्री पद नराख्न दवाव दिएको स्रोतको दाबी छ ।

यसअघि उपप्रधानमन्त्री भैसकेका श्रेष्ठ र सभामुख भैसकेका महरा मन्त्री मात्र बन्न सरकारमा जान मिल्दैन । वरु देव गुरुङलाई माओवादीको नेतृत्व गर्नेगरी सरकारमा पठाउन प्रचण्ड सकारात्मक बनेको बताइन्छ । यद्दपी श्रेष्ठ र महराले दाबी भने छोडेका छैनन् ।

यता प्रधानमन्त्री देउवा भने गठबन्धनको किचलोकै कारण प्रधानमन्त्री बनेको ३ साता वितिसक्दा पनि मन्त्रिमण्डल विस्तार गर्न नसकेको भन्दै गठबन्धनका नेताहरुसँग रुष्ठ बनेका छन् । उनले गत शनिबार प्रचण्ड, डा बाबुराम भट्टराई र उपेन्द्र यादवलाई बालुवाटारमा बोलाएरै मन्त्रीको लिस्ट दिन आजसम्मको अल्टिमेटम दिएका थिए । तर यसअवधिमा मन्त्रीको नाम टुंगो लगाउन नत माओवादी सफल भयो न त जसपा नै ।

त्यसैगरी कहिले सरकारमा सहभागी हुने त कहिले सहभागी नहुने बताउँदै आएको माधव नेपाल समूहको दोधारे नीतिले पनि मन्त्रिपरिषद् विस्तारमा बाधक बनेको छ । मन्त्री छान्न बोलाइएको माओवादी केन्द्रको बैठक नै अनिश्चितकालको लागि स्थगित हुँदा मन्त्रीपरिषद् विस्तार तप केही दिनलाई टरेको बताइन्छ ।