स्पेनिस ला लिगा फुटबल अन्तर्गत मंगलबार राति भएको खेलमा एट्लेटिको मड्रिड विजयी भएको छ । गए राति भएको खेलमा गेटाफे एट्लेटिको मड्रिडसँग २-१ ले पराजित हुन पुग्यो ।

निकै प्रतिस्पर्धात्मक बनेको खेलमा खेलको ४५ औं मिनेटमा मड्रिडका गोलकिपर जोन ओब्लाकले आत्मघाती गोल गर्दै गेटाफेलाई अग्रता दिलाएका थिए । गेटाफेका स्टेफन मित्रोभिकको हेड पोस्टमा लागेपछि उक्त बल गोलकिपर ओब्लाकलाई छुदै गोल भएको थियो । पहिलो हाफ १-० मा सकिएको खेलमा एट्लेटिकोले दोस्रो हाफमा दुई गोल गर्यो ।

उसका लागि दुवै गोल गरे लुइस सुआरेजले गरे । सुआरेजले खेलको ७८ औं र ९० औं मिनेटमा विजयी गोल गर्दै एट्लेटिकोलाई २-१ को जित दिलाए । त्यसअघि खेलको ७४ औं मिनेटमा गेटाफेका कार्लिस एरिना रातो कार्ड खादै मैदान बाहिरिएका थिए । जितसँगै एट्लेटिको ६ खेलमा १४ अंक जोड्दै लिगको शीर्ष स्थानमा उक्लेको छ भने अंक जोड्न नसकेको गेटाफे रेलिगेशन क्षेत्रमा रहेको छ ।