चौथो संस्करणको एभरेस्ट प्रिमियर लिग (ईपीएल) टी–ट्वान्टी क्रिकेट अन्तर्गत आज (आइतबार) भएको पहिलो खेलमा विराटनगर वारियर्स विजयी भएको छ । आज भएको खेलमा काठमाडौं किंग्स-११ विराटनगरसँग ७ रनले पराजित हुन पुग्यो । जितसँगै विराटनगरले सान्त्वना जित हात पारेको हो ।

मैदान चिसो भएका कारण खेल ८ ओभरमा झारिएको थियो । टियु क्रिकेट मैदानमा टस हारेर पहिले ब्याटिङ गरेको विराटनगरले ५ विकेट गुमाउदै १०४ रन बनायो । विराटनगरका लागि अनिल साह ४५ रनमा अविजित रहँदा रायन पठानले ३० रन जोडे । त्यस्तै कप्तान करण केसी १५ रन बनाई आउट भए भने सौरभ खनाल ५ रनमा अविजित रहे । काठमाडौंका लागि कप्तान सन्दीप लामिछाने, गुल्सन झा र रायन बर्लले समान १-१ विकेट लिए ।

१०५ रनको लक्ष्य लिएर मैदान उत्रेको काठमाडौँले निर्धारित ८ ओभरमा ३ विकेट गुमाउदै ९७ रन मात्र बनाउन सक्यो । काठमाडौंका लागि रहमानउल्लाह गुर्बाजले २८ रन बनाए भने सुवास खकुरेल २६ रनमा अविजित रहे । त्यस्तै राजु रिजाल २४  रनमा अविजित रहँदा रायन बर्लले १५ रन जोडे । विराटनगरका लागि रायन पठानले २विकेट लिँदा प्रतिस जिसीको भागमा १ विकेट रह्यो । जितसँगै विराटनगरले ५ खेलमा २ अंक जोड्दै तालिकाको पुछारमा छ भने ३ खेलमा २ अंक जोडेको काठमाडौँ पाँचौं स्थानमा रहेको छ ।