नेपाली चलचित्रकी अभिनेत्री करिश्मा मानन्धरको आज (शुक्रबार) बर्थडे (जन्मदिन) परेको छ । आजबाट उनी ५० वर्ष पुगेकी छिन् । नेपाली सिने क्षेत्रको सफल अभिनेत्रीको रुपमा परिचित करिश्माले १४ वर्षको उमेरमा फिल्म ‘सन्तान’बाट आफ्नो अभिनय करिअर सुरु गरेकी हुन् ।

कक्षा आठमा पढिरहेकी बेला उनी सिनेमा क्षेत्रमा प्रवेश गरेकी थिइन् । नेपाली फिल्म क्षेत्रमा सदावहार अभिनेत्रीको रुपमा परिचित उनको सफल चलचित्रमा कस्तुरी, ट्रक ड्राइभर, भाउजु, एक नम्बरको पाखेलगायतका रहेका छन् । भर्खर १२ कक्षा पास गरेकी करिश्माले आफ्नो जन्मदिन खासै मनाउने नगरेको बताउँछिन् ।

नेपाली फिल्म क्षेत्रमा निर्माता र अभिनेत्रीको परिचय समेत बनाएकी करिश्माले तीन दशक बढी समय नेपाली कला क्षेत्रमा बिताइसकेकी छन् । त्यस्तै अहिले उनी आफ्नो पुस्तक ‘आत्मकथा’का लागि तयारी गर्दै आएकी छिन् । केही समयअघि राजनीतिमा पनि सक्रिय हुँदै आएकी उनी अहिले राजनीति भन्दा टाढा रहेकी छिन् ।