म्यानचेस्टर युनाईटेड इंग्लिस प्रिमियर लिग फुटबलमा बराबरीमा रोकिएको छ । मंगलबार राति भएको खेलमा बर्नलीले म्यानचेस्टर युनाईटेडलाई १-१ को बराबरीमा रोकेको हो ।

निकै प्रतिस्पर्धात्मक बनेको खेलमा सुरुआती अग्रता जोगाउन नसक्दा युनाईटेडले बराबरीमा चित्त बुझाउनु पर्यो । खेलको १८ औं मिनेटमा पाउल पोग्बाले गोल गर्दै युनाईटेडलाई अग्रता दिलाएका थिए । पहिलो हाफ १-० मा सकिएको खेलमा दोस्रो हाफको ४७ औं मिनेटमा बर्नलीका जे रोड्रीगेजले गोल गर्दै खेललाई बराबरीमा ल्याए ।

त्यसपछि थप समयमा दुबै टोलीबाट गोल भएन र खेल १-१ को बराबरीमा सकियो । बराबरीसँगै युनाईटेड २३ खेलमा ३९ अंक जोड्दै तालिकाको पाँचौं स्थानमा छ भने समान खेलबाट १४ अंक जोडेको बर्नली पुछारमा रहेको छ । यसैगरी मंगलबार राति नै भएको अन्य खेलमा न्युकासलले एभर्टनलाई ३-१ ले पराजित गर्दा वाट्फोर्ड वेस्ट ह्यामसँग १-० ले पराजित हुन पुग्यो ।