पहिलो टी-ट्वान्टी खेलमा नेपालले जिम्बाबे ‘ए’ जितको लागि १८२ रनको लक्ष्य प्रस्तुत गरेको छ । आज(आइतबार) काठमाडौँको त्रिवि मैदानमा टस हारेर पहिले ब्याटिङ गरेको नेपालले निर्धारित २० ओभरमा ५ विकेट गुमाउँदै १८१ रन बनाएको थियो ।

नेपालको लागि मोहम्मस अदिल अलामले ४७ रनमा अविजित रहे भने कुशल भुर्तेलले रन बनाए । त्यस्तै रोहित कुमार पौडेल ३६ रन बनाई आउट भए भने दिपेन्द्र सिंह ऐरीले २८ रन जोडे । जिम्बाबे ‘ए’ को लागि ब्राड इभान्स, लुक जोङ्गइ, ब्र्यनडन माभुटा र जोन मसराको भागमा समान १-१ विकेट रह्यो ।

घरेलु मैदानमा नेपालले जिम्बाबे ‘ए’ विरुद्ध एकदिवसिय र टी–ट्वान्टी सिरिज खेल्न लागेको हो । नेपालले जिम्बाबे ‘ए’ सँग तीन ५० ओभरको र तीन टी-२० खेल खेल्नेछ । नेपाल जिम्बाबेलाई हराउँदै सिरिजमा सुखद सुरुआत गर्ने योजनाका साथ मैदान उत्रदैछ भने पाहुना टोली पनि घरेलु टोली नेपाललाई उसकै मैदानमा हराउदै सिरिजमा विजयी सुरुवात गर्ने योजनामा रहेको छ ।

यसअघि पहिला एकदिवसीय खेल्ने तय भैसकेको भएपनि शनिबार पानी परेकाले मैदान चिसो भए पछि एकदिवसीय स्थगित गरेर पहिला टी- २० सिरिज खेल्ने तय भएको नेपाल क्रिकेट संघ (क्यान)ले जनाएको छ । सिरिज अन्तर्गत नेपालले दोस्रो टी-२० खेल सोमबार र तेस्रो तथा अन्तिम खेल आगामी बुधबार खेल्नेछ । टी-ट्वान्टी सिरिज पछि नेपालले एकदिवसीय सिरिज खेल्नेछ । १० दिन चल्ने सिरिजमा जिम्बाबेका राष्ट्रिय टोलीमा रहेका खेलाडीको समेत सहभागिता रहने छ । आईसीसी पुरुष क्रिकेट विश्वकप लिग टु अन्तर्गत अमेरिकामा हुने त्रिकोणात्मक एकदिवसीय सिरिजको तयारीमा स्वरूप नेपालले जिम्बावे ‘ए’ सँग सिरिज खेल्न लागेको हो ।