इन्डियन प्रिमियर लिग (आईपीएल) टी-ट्वान्टी क्रिकेटमा कोलकाता नाइट राइडर्सले विजयी भएको छ । शनिबार राति कोलकाताले सनराईजर्स हैदरावादलाई ५४ रनले पराजित गरेको हो ।
पुनेमा टस हारेर पहिले ब्याटिङ गरेको कोलकत्ताले २० ओभरमा ६ विकेट गुमाउँदै १७७ रन बनाएको थियो । कोलकाताका लागि आन्द्रे रसेलले अविजित रहँदै ४९ रन बनाए भने साम विलिङ्सले ३४ रन जोडे । त्यस्तै अन्जिका रहानेले २८ रन बनाई आउट भए भने नितिश राना २६ रकप्तान श्रेयस एयरले १५ रन जोडे । हैदरावादका लागि उम्रन मलिकले ३ विकेट लिए ।
१७८ रनको लक्ष्य लिएर मैदान उत्रेको हैदरावादले निर्धारित २० ओभरमा ८ विकेट गुमाउँदै १२३ रन मात्र बनाउन सक्यो । हैदरावादका लागि अविशेक शर्माले ४३ रन बनाए भने एडिन मार्कम्यानले ३२ रन जोड्दा शशांक सिंहले ११ रन बनाए । कोलकाताका लागि आन्द्रे रसेलले ३ विकेट लिए भने टिम साउथीको भागमा २ विकेट रह्यो ।
जितसँगै कोलकाता १२ खेलमा १२ अंक जोड्दै तालिकाको छैटौं स्थानमा उक्लिएको छ । १२ खेलमा १० अंक जोडेको हैदरावाद आठौं स्थानमा रहेको छ । प्रतियोगिता अन्तर्गत आज दुई खेल हुँदै छन् । पहिलो खेलमा चेन्नई सुपर किङ्ग्स र गुजरात टाईटन्स भिड्दै छन् भने दोस्रो खेलमा लखनउ सुपर जाइन्ट्स र राजस्थान रोयल्स आमने सामने हुँदै छन् ।
