इन्डियन प्रिमियर लिग (आईपीएल) टी-ट्वान्टी क्रिकेटमा सनराईजर्स हैदरावाद विजयी भएको छ । मंगलबार राति भएको खेलमा हैदरावादले मुम्बई इन्डियन्सलाई ३ रनले पराजित गरेको हो ।
मुम्बईमा टस हारेर पहिले ब्याटिङ गरेको हैदरावादले निर्धारित २० ओभरमा ६ विकेट गुमाउँदै १९३ रन बनाएको थियो । हैदरावादका लागि राहुल त्रिपाठीले ७६ रनको अर्धशतकीय पारी खेले भने प्रियम गार्गले ४२ रन बनाए । त्यस्तै निकोलस पुरनले ३८ रन जोडे । मुम्बईका लागि रमनदीप सिंहले ३ विकेट लिए भने जस्प्रित बुम्राह, ड्यानियल साम्स र रिले मेरीदिथको भागमा समान १-१ विकेट रह्यो ।
१९४ रनको लक्ष्य लिएर मैदान उत्रेको मुम्बईले निर्धारित २० ओभरमा ७ विकेट गुमाउँदै १९० रनमात्र बनाउन सक्यो । मुम्बईका लागि कप्तान रोहित शर्माले ४८ रन बनाए भने टिम डेभिडले ४६ रन जोडे । यस्तै इशान किशन ४३ रन बनाई आउट भए भने ड्यानियल साम्सले १५ रन जोड्दा रमनदीप सिंह १४ रनमा अविजित रहे । हैदरावादका लागि उम्रन मालिकले ३ विकेट लिए भने वासिङ्गटन सुन्दर र भुवनेश्वर कुमारको भागमा समान १-१ विकेट रह्यो ।
जितसँगै हैदरावाद १३ खेलमा १२ अंक जोड्दै तालिकाको आठौँ स्थानमा छ भने १३ खेलमा ६ अंक जोडेको मुम्बई पुछारमा रहेको छ । प्रतियोगिता अन्तर्गत आज कोलकाता नाइट राइडर्स र लखनउ सुपर जाइन्ट्स भिड्दै छन् ।
