अफगानिस्तानविरुद्धको दोस्रो टी-२० खेलमा घरेलु टोली आयरल्याण्ड विजयी भएको छ । बिहीबार राति भएको खेलमा आयरल्याण्डले अफगानिस्तानलाई ५ विकेटले पराजित गरेको हो । जितसँगै ५ खेलको टी-ट्वान्टी सिरिजमा आयरल्याण्डले २-० को अग्रता बनाएको छ ।

आयरल्याण्डको बेलफास्टमा टस जितेर पहिले ब्याटिङ गरेको अफगानिस्तानले निर्धारित २० ओभरमा ८ विकेट गुमाउँदै १२२ रन बनाएको थियो ।अफगानिस्तानको लागि हजमतुल्लाह शाहिदीले ३६ रन बनाए भने ईब्राहिम जाद्रनले १७ रन जोडे । त्यस्तै अजमतुल्लाह उमरजाई ११ रन बनाई आउट भए भने नभिन उल हक १० रनमा अविजित रहनु बाहेक अन्यको प्रदर्शन उल्लेखनीय रहेन । आयरल्याण्डका लागि कटिर्स च्याम्फियर,गारिथ डेल्ने, मार्क अडिर तथा जोस लिटिलको भागमा समान २-२ विकेट रह्यो ।

१२३ रनको लक्ष्य लिएर मैदान उत्रेको आयरल्याण्डले १९ ओभरमा ५ विकेट गुमाउँदै पूरा गर्यो । उसका लागि कप्तान एन्डी बालबेर्नी ४६ रन बनाए भने लोर्कन टुकर २७ रन जोड्दा जर्ज डकरेल २५ रनमा अविजित रहे । अफगानिस्तानको लागि कप्तान मोहम्मद नाबीले २ विकेट लिए भने मुजिब उर रहमान, फजहक फरिकि तथा नभिन उल हकको भागमा समान १-१ विकेट रह्यो । यी दुई टोलीबीचको तेस्रो टी-२० खेल आज (शुक्रबार) हुनेछ ।