नेपाली चलचित्रका अभिनेता अनुपविक्रम शाही नेपाली काँग्रेसमा प्रवेश गरेका छन् । आज (शुक्रबार) मन्त्री निवास पुल्चोकमा आयोजित पार्टी प्रवेश कार्यक्रममा गृहमन्त्री एवं काँग्रेस नेता बालकृष्ण खाँणले शाहीलाई पार्टी सदस्यतासँगै नेपाल तरुण दलको सदस्यता पनि दिएका हुन् ।

कार्यक्रममा तरुण दलका पूर्व अध्यक्षहरू महेन्द्र यादव, उदय शम्शेर राणा, जितजंग बस्नेतका साथै अध्यक्ष विद्वान गुरुङलगायतको पनि उपस्थिति रहेको थियो । अभिनेता शाहीले लोकतन्त्र र जनताको अधिकारका लागि काँग्रेसले गरेको योगदान बुझेर पार्टी प्रवेश गरेको बताए । ‘म यसअघि कुनै पनि पार्टीमा आवद्ध थिइन् । पहिलो पटक काँग्रेससँग आवद्ध भएको हुँ,’ उनले भने, ‘काँग्रेसले नेपालमा लोकतन्त्रका लागि संघर्ष गरेको भनेर पढ्दै सुन्दै आइयो । अब बुझ्दै जाँदा अरुभन्दा काँग्रेस नै ठीक लाग्यो ।’

साथै उनले काँग्रेस कलाकारको सम्मान गर्ने पार्टी भएकोसमेत बताए । ‘धेरै अग्रज र सम्मानित कलाकारहरु काँग्रेसमा हुनुहुन्छ, यसले पनि मलाई काँग्रेस मन परेको हो,’ उनले भने । उनले आफू युवा भएकाले तरुण दलमार्फत् युवाका पक्षमा काम गर्न चाहेको बताए । अभिनेता शाहीले दुई दर्जन बढी चलचित्रमा अभिनय गरेका छन् । उनले द्रव्य, सौर्य, वीर विक्रम, कमलेको विहे, कृ, हुर्रे, लिलिबिलीलगायत चलचित्रमा अभिनय गरेका छन् ।