न्युजिल्याण्डले दोस्रो एकदिवसीय क्रिकेटमा वेस्ट इन्डिजलाई पराजित गरेको छ । शनिबार बिहान भएको खेलमा न्युजिल्याण्डले घरेलु टोली वेस्ट इन्डिजलाई डिएल मेथडमा ५० रनले पराजित गरेको हो । जितसँगै तीन खेलको एकदिवसीय सिरिज १-१ को बराबरीमा पुगेको छ ।

बारबाडोसमा टस हारेर पहिले ब्याटिङ गरेको न्युजिल्याण्ड ४८ ओभर २ बलमा अलआउट हुँदै २१२ रनमा समेटिएको थियो । न्युजिल्याण्डको लागि फिना एलेनले ९६ रनको अर्धशतकीय पारी खेले भने ड्यारियल मिचेलले ४१ रन बनाए । त्यस्तै मिचेल स्टानरले २६ रनमा अविजित रहँदा ट्रेन्ट बोल्टले १६ रन जोडे । वेस्ट इन्डिजको लागि केभिन सिन्केलियरले ४ विकेट लिए भने जेसन होल्डरले ३ विकेट लिँदा अकिल होसेन २ र अल्जारी जोसेपको भागमा १ विकेट रह्यो ।

खेलमा पानी परेपछि वेस्टइन्डिजले ४१ ओभरमा डिएल मेथड अनुसार २१२ रनकै लक्ष्य पाएको थियो । २१२ रनकै लक्ष्य लिएर मैदान उत्रेको घरेलु टोली ३५ ओभर ३ बलमा अलआउट हुँदै १६१ रनमा समेटियो । वेस्ट इन्डिजको लागि याननिची कारियहले ५२ रनको अर्धशतकीय पारी खेले पनि टोलीलाई जित दिलाउन सकेनन् । यस्तै अल्जारी जोसेप ४९ रन बनाई आउट भए भने कियक कार्टिक तथा शाही होपले समान १६-१६ रन जोडे । न्युजिल्याण्डको लागि टिम साउथीले ४ विकेट लिँदा ट्रेन्ट बोल्टले ३ र मिचेल स्टानरको भागमा १ विकेट रह्यो । अब यी दुई टोलीबीचको तेस्रो तथा अन्तिम एकदिवसीय खेल आइतबार हुनेछ ।