राष्ट्रपति विद्यादेवी भण्डारीले नेपाली कांग्रेसका नेता प्रदीप गिरीको स्वास्थ्य अवस्थाबारे जानकारी लिएकी छिन् । शनिबार राष्ट्रपति भण्डारीले ललितपुरस्थित मेडिसिटी अस्पताल पुगेर गिरीको स्वास्थ्यबारे जानकारी लिएकी हुन् ।

राष्ट्रपति भण्डारीले नेता गिरीको स्वास्थ्यलाभको कामना पनि गरेकी छिन् । अस्पतालका सञ्चालक समितिका अध्यक्ष डा उपेन्द्र महतोले नेता गिरिको स्वास्थ्य अवस्थाबारे राष्ट्रपतिलाई जानकारी गराएको राष्ट्रपतिको सचिवालयले जनाएको छ ।

घाँटीको क्यान्सरबाट पिडित गिरी लामो समय भारतको मुम्बइका विभिन्न अस्पतालमा उपचारपश्चात् केही महिना अघि नेपाल फर्किएका थिए ।नेपाल आएपछि उनमा निमोनिया देखिएको र थप उपचारका लागि गत साउन नौ गते नेपाल मेडिसिटी अस्पताल भर्ना गरिएको थियो । उनको उपचारमा डा पङ्कज बर्मन नेतृत्वको चिकित्सक टोली संलग्न छ । उनको भेन्टिलेटरमा उपचार भइरहेको छ ।