इंग्लिस प्रिमियर लिग फुटबलमा म्यानचेस्टर युनाईटेड विजयी भएको छ । सोमबार राति भएको खेलमा म्यानचेस्टर युनाईटेडले लिभरपुललाई २-१ ले पराजित गर्दै सिजनको पहिलो जित निकालेको हो ।

म्यानचेस्टर युनाईटेडलाई विजयी गराउन जाडोन सान्चो र मार्कस राषफोर्डले समान १-१ गोल गरे भने लिभरपुलका लागि मोहमद सलाहले एक गोल गरे । म्यानचेस्टर युनाईटेडको घरेलु मैदानमा भएको निकै प्रतिस्पर्धात्मक बनेको खेलमा खेलको १६ औं मिनेटमा सान्चोले गोल गर्दै म्यानचेस्टर युनाईटेडलाई अग्रता दिलाएका थिए ।

पहिलो हाफ १-० मा सकिएको खेलमा दोस्रो हाफमा दुबै टोलीले समान १-१ गोल गरे । खेलको ५३ औं मिनेटमा राषफोर्डले गोल गर्दै घरेलु टोलीको अग्रता दोब्बर बनाए । त्यस्तै खेलको ८१ औं मिनेटमा लिभरपुलका सलाहले गोल गर्दै खेललाई २-१ को स्थितिमा ल्याए । त्यसपछि थप समयमा कुनै टोलीबाट गोल भएन र खेल म्यानचेस्टर युनाईटेड २-१ ले आफ्नो पक्षमा पार्दै महत्वपूर्ण ३ अंक प्राप्त गर्यो । जितसँगै युनाईटेड ३ खेलमा ३ अंक जोड्दै तालिकाको १४ औं स्थानमा उक्लिएको छ भने ३ खेलमा २ अंक जोडेको लिभरपुल १६ औं स्थानमा रहेको छ ।