नवकान्तिपुर संवाददाता
काठमाडौं, ३ असोज ।
नेपालको अन्तर्राष्ट्रिय फिचर फिल्म छनोट समितिले सुजित बिडारी निर्देशित फिल्म ‘ऐना झ्यालको पुतली’ अमेरिकामा अर्को वर्ष हुने ओस्कार अवार्डको ९५औं सँस्करणका लागि सिफारिस गर्ने निर्णय गरेको छ । आज (सोमबार) बसेको बैठकले ‘ऐना झ्यालको पुतली’ लाई ओस्कारका लागि सिफारिस गर्ने निर्णय गरेको हो ।
समितिलाई प्राप्त फिल्म मध्येबाट समितिले ‘ऐना झ्यालको पुतली’लाई ओस्कार अवार्डको लागि छनोट गरेको हो । यसअघि नेपालको अन्तर्राष्ट्रिय फिचर फिल्म छनोट समितिले ओस्कारको प्रतिस्पर्धामा सामेल हुन इच्छुक फिल्मकर्मीलाई २०७९ भदौ ३० गतेभित्र फिल्म बुझाउन आग्रह गरेको थियो । जसमा दिनेश राउत निर्देशित ‘प्रकाश’, सुवर्ण थापा निर्देशित ;राधा’ र सुजित बिडारी निर्देशित ‘ऐना झ्यालको पुतली’ले सहभागिताका लागि आवेदन दिएका थिए ।
समितिले प्राप्त तीन फिल्ममध्ये सिनेमाको प्राविधिक पक्ष, कथ्यको प्रस्तुति, चरित्रहरूको भावनात्मक विश्लेषण तथा प्रस्तुतिको कलात्मकता आदि पक्षलाई ख्याल गरी ‘ऐना झ्यालको पुतली’ लाई सिफारिस गर्ने निर्णय गरेको हो । ओस्कार अवार्ड आगामी मार्च १२ का दिन आइतबार लस एञ्जल्सको डल्बी थिएटरमा आयोजना हुँदैछ । नेपालमा विमल पौडेलको अध्यक्षतामा आठ सदस्यीय अन्तराष्ट्रिय फिचर फिल्म छनोट समिति रहेको छ । समितिमा लक्ष्मीनाथ शर्मा, प्रदीपकुमार उपाध्याय, राजेन्द्र शलभ, राजुविक्रम थापा, सामीप्यराज तिमल्सेना, लोकेन्द्र पराजुली ‘कपील’, चिरञ्जीवी गुरागाईँ सदस्य रहेका छन् ।
