नेपाल प्रहरीका पूर्वआइजीपी सर्वेन्द्र खनाल नेकपा एमाले प्रवेश गरेका छन् । आज (बिहीबार) पार्टी कार्यालय, च्यासलमा एमाले अध्यक्ष केपी शर्मा ओली लगायतका नेताहरुले खनाललाई पार्टी प्रवेश गराएका हुन् ।

कार्यक्रममा महासचिव शंकर पोखरेल, उपमहासचिव विष्णु रिमाललगायतका नेताहरूको उपस्थिति थियो । खनालले आफू एमालेमा प्रवेश गर्न पाउँदा हर्षविभोर भएको बताए । ‘एमालेमा प्रवेश गर्न म पाउँदा हर्षविभोर भएको छु । आम नेपालीको अपेक्षा, देश विदेशको आस्थाको केन्द्र, समृद्ध नेपाल सुखी नेपालीको नारा अघि बढाउने प्रणेताको हातबाट नेकपा एमालेको जस्तो गरिमामय पार्टीको सदस्यता लिन पाउँदा खुसी छु’ उनले भने ।

त्यस्तै उनले केपी ओली जस्तो प्रधानमन्त्री नभेटिएको बताएका छन् । उनले भने, ‘मैले सातवटा प्रधानमन्त्री भोगे तर उहाँजस्तो राष्ट्रवादी र सत्यको पक्षमा लाग्ने प्रधानमन्त्री पाइनँ ।’ त्यसैगरी काठमाडौं क्षेत्र नम्बर ६ मा स्वतन्त्र रूपमा उम्मेदवारी दिने घोषणा गरेका अब्दुस मियाँ पनि नेकपा एमाले प्रवेश गरेका छन् । उनलाई पनि एमाले अध्यक्ष ओलीलगायत नेताहरुले पार्टी प्रवेश गराएका हुन् ।