नवकान्तिपुर संवाददाता
काठमाडौं, १८ कार्तिक ।
नेकपा (एमाले)को चुनावी सभा दार्चुलाबाट सुरु हुँदैछ। शुक्रबार एमाले अध्यक्ष केपी शर्मा ओलीले सुदूरपश्चिम प्रदेशको दार्चुलामा आयोजना गरिने चुनावीसभालाई सम्बोधन गर्ने कार्यक्रम रहेको छ ।
सभालाई सम्बोधन गर्न उनी आज हेलिकोप्टरमार्फत केहीबेरमा दार्चुलाको सदरमुकाम खलङ्गा पुग्दैछन् । कार्यक्रममा सहभागी हुन ओली बिहीबार नै धनगढी पुगिसकेका छन् । बिहान ११ बजे उनले खलङ्गामा अभियानको उद्घाटन गर्ने कार्यक्रम रहेको प्रतिनिधिसभाका उम्मेदवार गणेशसिंह ठगुन्नाले जानकारी दिए ।
ओलीले आजै बैतडी र कञ्चनपुरको आमसभालाई सम्बोधन गर्ने तय भएको बताइएको छ । यसअघि अध्यक्ष ओलीले २०७० सालको संविधानसभा निर्वाचनका क्रममा दार्चुलाको गोकुलेश्वरमा आयोजित आमसभालाई सम्बोधन गरेका थिए ।
