प्रधानमन्त्री पुष्पकमल दाहालको सरकारमा नेकपा (एमाले) पार्टी उपाध्यक्ष विष्णु पौडेलको नेतृत्वमा सहभागी हुने भएको छ । पौडेल अर्थ मन्त्रालयसहित उपप्रधानमन्त्रीको जिम्मेवारी सम्हाल्ने गरी सरकारमा गएका हुन् ।

त्यस्तै एमालेले पौडेलसहित, दामोदर भण्डारी, ज्वालाकुमारी साह र राजेन्द्र राईलाई आजै सरकारमा सहभागी गराउने तयारी गरेको छ । पौडेलबाहेक अन्यको मन्त्रालय टुंगो लागेको छैन । यसअघि आज बिहान बसेको नेकपा माओवादी केन्द्रको पदाधिकारी बैठकले नारायणकाजी श्रेष्ठलाई पनि उपप्रधानमन्त्री बनाउने निर्णय गरिसकेको छ ।

यता राष्ट्रिय स्वतन्त्र पार्टीका अध्यक्ष रवि लामिछानेले पनि उपप्रधानमन्त्रीसहित गृहमन्त्रालयमा दाबी गरेका छन् । लामिछाने आफूले उपप्रधानमन्त्रीसहित गृह मन्त्रालयमा दाबी गरिएको तर, यसको टुङ्गो लगाउने जिम्मा प्रधानमन्त्रीलाई दिइएको बताए ।