देशका विभिन्न स्थानबाट मृत अवस्थामा ५ जना फेला परेका छन् । इलाम, सूर्योदय नगरपालिका-३ कटेवुङ टोल बस्ने ४८ वर्षीय देउ कुमार राई सोही ठाउँस्थित बाटोमा सोमबार मृत अवस्थामा फेला परेका छन् ।

त्यस्तै काठमाडौं, काठमाडौं महानगरपालिका-१५ स्वयम्भू बुद्धपार्क नजिक सडक पेटीमा हाल नाम, थर, वतन नखुलेका अन्दाजी ३६ वर्षीय पुरुष सोमबार मृत अवस्थामा फेला परेका छन् ।

यता अर्घाखाँची, सन्धिखर्क नगरपालिका-६ जुकेखोलास्थित नालीमा हाल नाम, थर, वतन नखुलेका अन्दाजी ६६ वर्षीय पुरुष मंगलबार मृत अवस्थामा फेला परेका छन् । यस्तै रूपन्देही, बुटवल उपमहानगरपालिका-६ शिवनगरस्थित सामुदायिक वनमा हाल नाम, थर, वतन नखुलेकी अन्दाजी ६५ वर्षीया महिला मंगलबार मृत अवस्थामा फेला परेकी छिन् ।

त्यसैगरी धनुषा, मिथिला नगरपालिका-३ हरिहरपुर बस्ने फगुनी महतोको गोठभित्र हाल नाम, थर, वतन नखुलेका अन्दाजी ६६ वर्षीय पुरूष मंगलबार मृत अवस्थामा फेला परेका छन् । यस सम्बनधमा प्रहरीले थप अनुसन्धान गरिरहेको छ ।