दिल पौडेल , सिन्धुली
काठमाडौं, १९ मंसिर ।
गाइॅगुइॅ हल्ला छ-
देशभित्र अचेल
आर्यघाट पुगेको लास व्यॅुझेर
नयॅा चटक देखाउन थालेको छ
बूढो मशानले,
इतिहास उल्टो गतिमा हिड्दैन
धार्मिक दास मालिक
सबैलाइ थाहा छ-
तैपनि तिनीहरुले
रामवाण ओखती भनेर
सर्पका माला, बाघका छाला
बलिको रातो टीका लगाउने
स्वघोषित भूत, प्रेत
मशानहरुले-
नेपाली जनतालाइ झुक्याउन
पश्चगामीहरूले
नयाँ कार्ड फालेको छ l
विराट हनुमानका
नग्न प्रदर्शन जारी छ,
राज्यको धार्मिक चरित्र हुँदैन
स्वप्ना, समर्पण, र
संघर्षको परिणति हो – गणतन्त्र l
केयौ पुस्ताको बलिदानीपछि
डम्पिंग साइटमा पुर्याएर
दिवास्वप्न देख्नेहरूको
हड्डी समेत गालेको छ
बूढो मशानले फेरि …..।
++++++++++++
कुनै पनि व्यवस्था पूर्ण हुँदैन
सबैलाई थाहा छ-
लठैत कठमुल्ला जमातको
प्रोपोगन्डाले
कुनै पराकम्पन ल्याउॅदैन l
नित्से भन्छन्-
ईश्वरको
मृत्यु भईसकेको छ,
तिमी कसरी
विष्णु अवतार फेरि ?
चिहान पुगेको चेतशून्य
निरंकुश वंशका सन्तान
बलात्कारी , हत्याहिंसाका
तिम्रा सिंहासन
देवीदेवता र कलाकृतिका
तस्कर
सयौ वर्षदेखिका मुलुकमारा
नेपाली जनताले अझै पालेको छ
बुढो मशानले ….।
+++++++++++
पञ्चायाको हण्डीमा मौलाएका
लोकतन्त्रमा बहुलाएका
एलिट वृत्तका झोलेहरू
भ्रामक कुरा खेतीका
स्टन्टबाजी हान्दै
दक्षिणी छिमेकीका
बुद्धीचालमा चलेको छ
बूढो मशानले फेरि ….।
++++++++++++++
कुरा स्पष्ट छ-
संघीय गणन्त्रको बाहक तिमी
हुँदै होइनौ
थुकको डोरी नबाट,
मानिसका चेतना र चिन्तन
अग्रगामी र प्रगतिशील छन्
तिमी जतिसुकै डर्टी ट्रिक चलाऊ
– बूढो मशान ?
अन्तत: विश्वमा तासका
चारवटा मात्र बादशाह
रहनेछन्
ध्यान राख – राजा निरोको
दरबार उहिल्यै जलेको छ
बूढो मशानको फेरि …।
