गण्डकी प्रदेश प्रमुख बाबुराम कुँवरले नेपाली भाषा र संस्कृतिको जगेर्नामा आदिकवि भानुभक्त आचार्यको महत्वपूर्ण योगदान रहेको बताएका छन् ।
आदिकवि भानुभक्त आचार्यको २०६औँ जन्मजयन्तीका अवसरमा भानु वाङ्मय प्रतिष्ठान पोखराले पोखराको फूलबारीस्थित भानुपार्कमा आयोजित कार्यक्रममा उनले नेपाली भाषा र साहित्यका माध्यमबाट भानुभक्तले नेपाली समाजलाई एकाकार बनाएको बताएका हुन् ।
भाषा र संस्कृति राष्ट्रियताको जगेर्नाका लागि पनि उत्तिकै महत्वपूर्ण रहेको उल्लेख गर्दै उनले यिनीहरूको संरक्षणका माध्यमबाट राष्ट्रियतालाई अझै मजबुत बनाउन सकिने विचार व्यक्त गरे ।
समाजमा विभिन्न किसिमबाट योगदान गर्न सकिन्छ भन्ने कुराको महत्वपूर्ण उदाहरण भानुभक्त भएको चर्चा गर्दै उनले भने, ‘भाषा र साहित्यका माध्यमबाट भानुभक्तले पु¥याएको योगदान हामी सबैका लागि प्रेरणादायी छ, उहाँ गण्डकी प्रदेशको मात्र नभई राष्ट्रकै अमूल्य निधि हुनुहुन्छ ।’
गण्डकी प्रदेशका प्रमुख सचिव हरिप्रसाद बस्यालले नेपाललाई नेपाली भनेर चिनाउने प्रमुख माध्यम नै नेपाली भाषा भएको चर्चा गरे । प्रतिष्ठानका अध्यक्ष एवं नेपाल सङ्गीत तथा नाट्य प्रज्ञा–प्रतिष्ठानका पूर्वकुलपति सरुभक्तले भानुभक्तको योगदानको कदर गर्दै गण्डकी प्रदेशको राजधानी पोखरामा भानुभक्तको पूर्ण कदसहितको शालिक र पार्कलाई साहित्यिक तीर्थस्थलका रुपमा विकास गर्ने लक्ष्य राखिएको जानकारी दिए ।
