प्रदेश नं– २ का मुख्यमन्त्री लालबाबु राउतले विपत्मा परेका बाढीपीडितलाई राहत दिलाउन आफू स्वयम् अग्रसर भई लागिपरेको बताएका छन् । शुक्रबार गौशालामा आयोजित कार्यकर्ता भेटघाट कार्यक्रममा कार्यकर्तालाई सम्बोधन गर्दै उनले बाढीपीडितका लागि प्रदेश सरकारले विभिन्न चरणमा राहतका कार्यक्रम ल्याएको जानकारी गराए ।

प्रदेश सरकारबाट तत्काल प्रत्येक जिल्लामा राहत वितरणका लागि रु १०-१० लाख छुट्याइएको छ भने मृतक परिवारका लागि रु तीन-तीन लाख उपलब्ध गराइने जनाउँदै सङ्घीय समाजवादी फोरम नेपालका प्रदेश सदस्यहरुले पीडितलाई राहत दिन आधा महीनाको तलब दिने घोषणा गरेको मुख्यमन्त्री राउतले बताए ।

तत्कालै बाढीपीडितलाई पिउनका लागि शुद्ध पिउने पानीको व्यवस्थापनका लागि हरेक जिल्लामा निर्देशन दिइएको मुख्यमन्त्री राउतले जानकारी गराए । उनले प्रदेशलाई महिलामैत्री बनाउन यहाँका हरेक क्षेत्रमा महिलालाई ५० प्रतिशत आरक्षणको व्यवस्था गरिएको बताए ।