बलिउडका महानायक अमिताभ बच्चन सामाजिक सञ्जालमा पनि निकै सक्रिय छन् । सामाजिक सञ्जाल फेसबुक, ट्विटर, इन्स्टाग्राममा निकै सक्रिय रहने अमिताभ यिनै एकाउन्टका कारण कहिलेकाहीँ तनावमा समेत पर्ने गरेका छन्।
उनी पछिल्लो समय सामाजिक सञ्जालमार्फत नै आफ्ना शुभचिन्तकहरुसँग जोडिदै र आफ्ना कुरा व्यक्त गर्दै आएका छन्। उनले सामाजिक सञ्जालबाट हुने समस्याहरु समेत आफ्ना शुभचिन्तकहरुसँग शेयर गर्दै आइरहेका छन् ।
पछिल्लो समय सामाजिक सञ्जाल फेसबुकका कारण उनी तनाबमा परेका छन्। शुक्रबार राति अमिताभ फेसबुकमा केही पोस्ट गर्न खोज्दै थिए। तर, फेसबुकले उनलाई पोस्ट गर्ने अनुमति नै दिएन । फेसबुकले पोस्टका लागि अनुमति नदिएपछि अमिताभले निकै समस्या झेल्नु पर्यो।
उनले रातको २ बजेसम्म प्रयास गर्दा पनि पोस्ट गर्न नसकेपछि उनले आफ्ना शुभचिन्तकसँग माफी समेत मागेका छन् । यो अवधिमा अमिताभसँग पेसबुकले पटकपटक कोड मागेको कारण झण्झट ब्योहोर्नु परेको समेत बताएका छन्।
पछिल्लो केही वर्षदेखि सामाजिक सञ्जाल फेसबुक चलाइरहेका अमिताभले भनेका छन्, ‘फेसबुक यति धेरै बोझिलो छ कि मलाई केही पोस्ट गर्ने अनुमति नै दिँदैन।’
हालै अमिताभले बलिउड यात्रा सुरु गरेको ५० वर्ष पुगेको छ। ‘सात हिन्दुस्तानी’बाट बलिउड यात्रा आरम्भ गरेका अमिताभ अहिले बलिउडका महानायकको परिचय बनाइसकेका छन्।
