अमेरिकी राष्ट्रपति डोनाल्ड ट्रम्पले आफू नभएको भए हङकङ १४ मिनेटमै ध्वस्त भइसक्ने बताएका छन् । उनले आफूले हङकङलाई ध्वस्त हुनबाट जोगाएको बताएका छन् ।

चिनियाँ राष्ट्रपति सी चिनफिङलाई लोकतान्त्रिक आन्दोलनलाई कुल्चनका लागि सैनिक पठाउन रोकेर आफूले हङकङलाई ध्वस्त हुनबाट जोगाएको उनको दाबी छ । उनले भनेका छन्,‘यदी म नभएको भए १४ मिनेटमा हङकङ ध्वस्त हुने थियो ।’ अमेरिकी संसदमा हङकङ लोकतन्त्र समर्थकका लागि विल पेश गरिएको थियो । यो बिलमाथि कुरा गर्दै ट्रम्पले भने,‘हामीलाई हङकङको साथमा उभिनु छ, तर म राष्ट्रपति सीको साथ खडा छु । उनी मेरा मित्र हुन्, उनी एक अविश्वसनीय व्यक्ति हुन् ।’

ट्रम्पले भने,‘शीले हङकङको बाहिर लाखौं सैनिक तैनाथ गरेका थिए, उनीहरु भित्र गइरहेका थिएनन् किनकी मैले उनलाई भनेको थिए कि यस्तो भुल नहोस् । यसले व्यापारमा नकारात्मक प्रभाव पार्नेछ ।’ अमेरिकी संसदमा हङकङ मानवअधिकार र लोकतन्त्र नियम पारित गरिएको छ । यसमा ट्रम्पले हस्ताक्षर गर्न बाँकी रहेको स्रोतले बताएको छ । पछिल्लो ६ महिनादेखि हङकङमा लोकतन्त्र समर्थकहरुले सरकारको विरोध गर्दै आन्दोलन गरिरहेका छन् ।