१३ औं दक्षिण एसिशयाली खेलकुद (साग) प्रतियोगिता अन्तर्गत पुरुष फुटबलको खेल तालिकामा श्रीलंका र माल्दिभ्सका प्रशिक्षकले असन्तुष्टि व्यक्त गरेका छन् । आइतबार प्रि म्याच कन्फरेन्समा श्रीलंका र माल्दिभ्सका प्रशिक्षकले फिफाको नियम विपरीत खेल तालिका सार्वजनिक गरेको गुनासो गरेका हुन् ।
समूह एमा नेपालसहित बंगलादेश र भुटान रहेका छन् भने समूह बीमा भारत, माल्दिभ्स र श्रीलंका रहेका रहेका थिए । तर भारतले साग फुटबलमा सहभागी नहुने जनाएपछि तालिका परिवर्तन भएको थियो ।
हरेक दिन खेल खेल्नु पर्दा खेलाडी घाइते हुनसक्ने भन्दै उनीहरुले आपत्ति जनाएका हुन् । ‘हरेक दिन खेल्दा खेलाडी घाइते हुने अवस्था बन्न सक्छ,’ माल्दिभ्सका प्रशिक्षकले भने ,‘भारत नआएपछि खेल तालिका किन परिवर्तन गरिएको?’
यसका साथै उनले हचुवाको भरमा खेल तालिका बनाएको र आफ्नो टिमले प्रिम्याच कार्यक्रमका २० मिनेट अगाडीमात्र नयाँ खेल तालिका थाहा पाएको बताए ।
यस्तै श्रीलंका टिमका प्रशिक्षकले भने आफ्नो टिम जित्नका लागि नेपाल आएको बताए ।
नेपाल आउनु अगाडी टिममा केहि परिवर्तन गरिएको उनले खुलासा गरे । सागमा सहभागिता जनाउन नमान्ने खेलाडी विरुद्ध एक्सन लिएको उनले बताए ।
श्रीलंकाका प्रशिक्षकले पनि खेल तालिका परिवर्तन गरिनुमा असन्तुष्टी जनाए । खेल भनेको नियममा रहेर खेल्नुपर्ने, हामी पदक जित्नका लागि आएका थियौ, तर अचानक सेड्युल परिवर्तन भएकाले केहि कठिन हुने बताए ।
यस्तै भुटानका कप्तानले आफ्नो टिम अन्डरडग रहेको बताए । उनले बंगलादेश विरुद्धको खेलका लागि आफुहरु तयार रहेको धारणा राखे । अरु टिमले जस्तो आफुहरुलाई खेल तालिकाका बारेमा कुनै टिप्पणी गर्न आवश्यक नरहेको बताए ।
प्रशिक्षकले भने भुटानले राम्रो फुटबल खेल्ने र सबैले स्वर्णका लागि लक्ष्य लिएको बताउँदै आफुहरु पनि त्यसैका लागि खेल्ने धारणा राखे । प्रशिक्षकले नेपाल र भुटानको बातावरण मिल्नु टिमका लागि फाइदाजनक हुने बताए ।
