विश्वमा केबल ३ वटाको संख्यामा रहेका सेता प्रजातिका जिराफमध्ये शिकारीले दुई जिराफ मारिदिएका छन् । शिकारीले मारेका दुई सेता जिराफको कंकाल केन्याको गरिसा शहरनजिक फेला परेको अन्तर्राष्ट्रिय सञ्चारमाध्यमले जनाएका छन् । तीनमध्ये अब एक भाले सेतो जिराफमात्र अस्तित्वमा छ ।

मारिएका जिराफहरु यसअघि तीन महिनाअघि मात्र देखा परेको स्थानीय इशाकबिनी हिरोला आरक्षले जनाएको छ । जिराफ मार्नेहरुको पहिचान र उनीहरुको उद्देश्यबारे केही स्पष्ट नभइसकेको जनाइएको छ ।

सेतो प्रजातिका जिराफ केन्यामा मात्र पाइन्छन् । केन्याली अधिकारीले जिराफ मारिएको घटनाबारे आवश्यक अनुसन्धान भइरहेको जनाएको छ । सन् २०१७ मा जिराफका तस्बीर सामाजिक सञ्जालमा भाइरल भएपछि चर्चित भएका थिए । पछिल्ला केही वर्षयता विश्वभर जिराफको संख्या ह्वात्तै घटेको छ । ३० वर्षअघि विश्वभर जिराफको संख्या १ लाख ५५ हजार रहेकोमा अहिले विश्वभर जिराफहरु ९७ हजारको संख्यामा मात्र पाइन्छन् ।