खाडीका देश र मलेसियामा कोरोना सङ्क्रमण बढीरहेको अवस्थामा त्यहाँ रहेका २६ जना नेपाली श्रमिकमा पनि यसको सङ्क्रमण देखिएको छ । साउदीमा ४ जना नेपाली श्रमिकलाई कोरोना सङ्क्रमण भएको पुष्टि भएपछि सङ्क्रमितको सङ्ख्या २६ पुगेको हो ।

अहिलेसम्म बहराइनमा १२, यूएईमा ८, साउदीमा ४, कुवेतमा १ र मलेसियामा १ जना गरी जम्मा २६ जना नेपाली श्रमिकलाई कोरोना सङ्क्रमण भएको पाइएको छ । तर यूएईमा भने दुई जना निको पनि भइसकेका छन् । ६ जनाको अस्पतालमा उपचार भइरहेको छ ।

खाडी देशमा सङ्क्रमण बढ्न थालेपछि अहिले त्यहाँको सरकारले पनि सुरक्षा सतर्कता बढाएको छ । विश्वका दुई सय ८ देशका १२ लाख ७३ हजार ७०९ जनामा सङ्क्रमण फैलिसकेको छ । ६९ हजार ४५६ जनाको ज्यान गएको छ भने दुई लाख ६२ हजार ४८६ जना निको भएका छन् ।