राष्ट्रिय प्रजातन्त्र पार्टी (राप्रपा)का अध्यक्ष पशुपति शमशेर राणाले महामारीमा हस्ताक्षर गराउने प्रधानमन्त्रीले जनताको घाउमा नूनचूक दलेको बताएका छन् । भारी बहुमतको सरकार दिने जनताको पिडा बिर्सिएर सरकारले नालायकी प्रदर्शन गरेको उनले आरोप लगाए । कोरोना महामारीबीच पार्टी अध्यक्ष र प्रधानमन्त्री पदमा पूर्ण केन्द्रीत रहने सत्ताशीन नेकपाले जनतासामु अक्षम्य अपराध गरेको राणाले बताए ।
‘इतिहासमै सर्वशक्तिशाली सरकार बनाइदिए जनताले । तर कोरोना भूलेका प्रधानमन्त्री हस्ताक्षर गन्नमै मग्न छन्’ उनले भने । ‘जनताको गाँस र बास कुन चरीको नाम, नेकपाको प्राथमिकता अध्यक्ष र प्रधानमन्त्रीको कुर्ची बनेको छ । यसले महामारीबाट जलीरहेको नेपाली मनमा घ्यू मात्र थपेको छ । यस्तो नालायकी, अपराध अक्षम्य छ ।’
राप्रपा अध्यक्ष राणाले ८० करोड रुपैयाँ बराबरको राहत बाडियो भन्ने सरकारको दावी व्यवहारमा लागू नभएको बताए । तीनै तहको सरकारले दीर्घ राहत र आर्थिक प्याकेज दिन नसकेकोमा चिन्ता व्यक्त गरे ।
उनले ट्वीट गर्दै भने, ‘एक मूठी नून, एक पोका तेल, एक केजी बदाम, यस्तो कनिका छराई समाधान होइन । बन्दाबन्दी एक महिना कट्यो, सरकार निंद्राबाट ब्यूझिएको छैन । संघ, प्रदेश, स्थानीय सरकार, कतै दीर्घ राहत योजना बनेको छैन । विशेष बजेट छुटाइएको छैन ।’
उनले भने, ‘स्थानीय सरकार स्थानीय जनताको अभिभावक बन्न पूर्ण चुकेका छन् । अपवादबाहेक देशव्यापी अनुभव यही छ ।’
स्थानीय सरकारहरूले दलीय आधारमा राहत बाँडेको भन्दै उनले आपत्ति जनाए । राहत बाँडबाँड, बजेट विनियोजना पारदर्शी हुनु पर्ने उनको भनाइ छ ।
