बिहीबार रोयल च्यालेन्जर्स बैंगलोर र किंग्स ११ पंजाबबीच भएको आइपिएलको खेलमा कमेन्ट्री गरिरहेका भारतीय राष्ट्रिय टिमका पूर्वकप्तान सुनील गावस्कर अचानक विवादमा फसे । उनले कमेन्ट्रीका क्रममा विराट कोहलीको विषयमा गरेको टिप्पणी विवादको विषय बन्यो । गावस्करले कमेन्ट्रीका क्रममा विराट फिडिङ र ब्याटिङ दुवैमा फ्लप भएपछि उनले लकडाउनका क्रममा अनुष्काको बलमा मात्र अभ्यास गरेको टिप्पणी गरेका थिए ।

यो टिप्पणीपछि सामाजिक संजालमा सुनील गावस्करको आलोचना त भयो नै स्वयं अनुष्का शर्माले पनि सुनील गावस्करप्रति आक्रामक टिप्पणी गरिन् । उनले पतीको खेललाई लिएर पत्नीमाथि टिप्पणी गर्ने किन सोचाइ आयो रु भनी गावस्करसँग जवाफ मागेकी थिइन् । गावस्करले अनुष्कालाई जवाफ दिएका छन् । भारतीय मिडिया इण्डिया टुडेसँग कुरा गर्दै गावस्करले अनुष्कालाई जवाफ दिएका हुन् ।

गावस्करले भनेका छन् ‘मैले कमेन्ट्रीमा केवल विराटको अभ्यास कमीको बारेमा भनेको थिएँ त्यसमा कुनै भद्दापन थिएन । मैले विराटको असफलताको लागि अनुष्कालाई दोष लगाएको छैन । मेरा शब्दहरुलाई गलत तरिकाले तोडमोड गरेर प्रस्तुत गरिएको छ । म अनुष्का र विराटसँग भन्छु कि एकपटक फेरि मेरो क्लिप ध्यानपूर्वक सुन्नु । मेरो तर्फबाट कुनै गलत बुझाइ छैन ।’