नेपाल कम्युनिस्ट पार्टी (नेकपा) ओली समूहका नेता तथा संविधानसभा सभामुख सुवासचन्द्र नेम्वाङले शनिवारको विराटनगरको सभाबाट प्रधानमन्त्री केपी शर्मा ओलीले केही महत्त्वपूर्ण सूचना सुनाउन चाहेको बताएका छन् । उनले संसद् पुर्नस्थापना नहुनेमा प्रधानमन्त्री ओलीले दुई सय प्रतिशत ढुक्क हुन भनेको बताए ।

‘प्रधानमन्त्रीज्यू विराटनगर आउनुभयो, हामी सबै स्वागत गर्न विमानस्थल गयौं । सदाझै उज्यालो अनुहार, केही समाचार सुनाउ–सुनाउ झै अनुहार थियो तर हामीले भनिहाल्नुभएन,’ उनले भने, ‘यो भव्य सभामा हामीलाई कुनै सूचना सुनाउन चाहनुभएको छ । कुनै महत्त्वपूर्ण सूचना हामीलाई सुनाउनुहुन्छ झै लागेको छ । के सूचना सुनाउनुहुन्छ भनेर पर्खिरहेको छु ।’

नेता नेम्वाङले जनताले वैशाख १७ र २७ गतेको निर्वाचन अनुमोदन गरिसकेका दाबी गरे । ‘निर्वाचनमा जाने भनेर जनताले फैसला गरिसके । सम्मानित सर्वोच्च अदालतको फैसला हामी कुरिरहेका छौं,’ उनले भने ।

कार्यक्रममा बोल्दै १ नम्बर प्रदेशका मुख्यमन्त्री तथा नेकपा ओली समूहका नेता शेरधन राईले खुमलटारमा दर्ता भएको दाहाल, नेपाल, खनाल कम्पनीले मुलुकलाई अँध्यारो सुरुङतिर लगेको आरोप लगाएका छन् ।

‘खुमलटारमा दर्ता भएको दाहाल, नेपाल, खनाल कम्पनीले देशलाई अराजकतातिर धकेल्न खोज्यो, राष्ट्रपतिलाई हटाएर, प्रधानमन्त्री र मुख्यमन्त्रीलाई अपदस्त गरेर मुलुक कब्जा गर्ने कित्ता देखापरेको छ,’ उनले भने, ‘यो कित्ताले अँध्यारो बाटो रोजेको छ, मुलुकलाई अँध्यारो सुरुङतिर लगेको छ ।’

‘हाम्रो कित्ता राष्ट्रियता र राष्ट्रवादी धारको नेतृत्वको केपी ओलीले गरिराख्नुभएको छ । हाम्रो कित्ता सुशासन, विकास र समृद्धिको कित्ता हो,’ उनले भने, ‘यो दुई कित्ताको बीचमा लडाइँ शुरू भएको छ ।’

नेकपा प्रचण्ड–नेपाल समूहले विकास र समृद्धिको यात्रामा भाँजो हाल्ने काम गरेको समेत उनले बताए ।