नुवाकोटको त्रिशुली अस्पतालमा कोरोना सङ्क्रमित भएर भर्ना भएका १०२ जना विमारीलाई नुवाकोट कांग्रेसले एक महिनासम्म बिहान बेलुकाको निःशुल्क खाना खुवाउने व्यवस्था गर्ने भएको छ । कोरोना पीडितहरूलाई अस्पतालमा खानकै समस्या आएपछि नुवाकोट कांग्रेसले उक्त पहल गरेको हो ।
यस मानवीय कार्यमा सामाजिक संस्थाहरू ओम यदि फाउण्डेसन तथा यशोदादेवी भगवानसिंह केसी मेमोरियल ट्रष्टले आर्थिक दायित्व वहन गर्ने र त्यसको समन्वय नेपाली कांग्रेस, नुवाकोटले गर्ने नुवाकोट कांग्रेसका सभापति जगदीश्वरनरसिंह केसीले अनलाइन पत्रिका नवकान्तिपुरलाई जानकारी दिए ।
समय समयमा महामारी तथा अन्य विपत्तिमा परेका जिल्लाबासीहरूलाई मानवीय सहयोग पुर्याउँदै आएका र त्यसैको निरन्तरता स्वरूप कोरोनाबाट आक्रान्त विमारीलाई विभिन्न सामाजिक संस्थाहरूको सहकारीतामा नुवाकोट कांग्रेसले समन्वयकारी भूमिका निर्वाह गरेको सभापति केसीले जानकारी दिए ।
सभापति केसीले अगाडि थपे ‘पछिल्लो समय मुलुक कोरोनाबाट आक्रान्त छ र सरकारले सशक्त रूपमा अभिभावकीय भूमिका निर्वाह गर्न सकिरहेको छैन । अक्सिजनको अभावले नागरिकको अकालमा ज्यान गइरहेको छ । अस्पताल भर्ना भएकैहरूको पनि साधन र श्रोतको अभावमा उचित व्यवस्थापन हुन सकिरहेको छैन । यस जटिल अवस्थामा राजनैतिक पार्टी र सामाजिक संस्थाहरूबाट गरिने सानो सहयोग पनि पीडितका लागि ठूलो राहत हुने कुरामा दुईमत छैन ।’
