इन्डियन प्रिमियर लिग (आईपीएल) क्रिकेटमा सनराइजर्स हैदरावादले विजयी भएको छ । बुधबार राति भएको खेलमा रोयल च्यालेन्जर्स बैंगलोर हैदरावादसँग ४ रनले पराजित हुन पुग्यो ।

अबुधाबीमा टस हारेर पहिले ब्याटिङ गरेको हैदरावादले निर्धारित २० ओभरमा ७ विकेट गुमाउदै १४१ रन बनाएको थियो । हैदरावादका लागि जेसन रोयले ४४ रन बनाए भने कप्तान केन विलियम्सनले ३१ रन जोडे । त्यस्तै जेसन होल्डर १६ रन बनाई आउट भए भने प्रियम गार्गले १५ र अविशेक शर्माले १३ रन बनाए । बैंगलोरका लागि हर्सल पटेलले ३ र डेन क्रिस्टियनको भागमा २ विकेट रह्यो ।

१४२ रनको लक्ष्य लिएर मैदान उत्रेको बैंगलोरले निर्धारित २० ओभरमा ६ विकेट गुमाउदै १३७ रन मात्र बनाउन सक्यो । बैंगलोरका लागि देबदुत पडिकलले ४१ रन बनाए भने ग्लेन म्याक्सवेलले ४० रन जोडे । त्यस्तै एबी डी भिलियर्सले १९ रनमा अविजित रहँदा शाहबाज अहमेदले १४ र श्रीकार भारतले १२ रन बनाए । हैदरावादका लागि भुवनेश्वर कुमार, जेसन होल्डर, राशिद खान, सिदार्थ कउल र उम्रन मलिकले समान १-१ विकेट लिए ।

जितसँगै हैदरावाद १३ खेलमा ६ अंक जोड्दै तालिकाको पुछारमा छ भने १३ खेलमा १६ अंक जोडेको बैंगलोर तेस्रो स्थानमा रहेको छ । प्रतियोगिता अन्तर्गत आज दुई खेल हुँदैछन् । पहिलो खेलमा चेन्नई सुपर किंग्स र पन्जाब किंग्स भिड्दै छन् भने दोस्रो खेलमा कोलकाता नाईट राइडर्स र राजस्थान रोयल्स आमने सामने हुने छन् ।