रियल मड्रिड र बार्सिलोना कोपा डेल रे फुटबलको अन्तिम १६ मा प्रवेश गरेका छन् । बुधबार राति भएको राउण्ड अफ ३२ को खेलमा रियलले अल्कोयानोलाई ३-१ ले पराजित गरेको भने बार्सिलोनाले लिनारेस डिपोर्टिभोलाई २-१ ले पराजित गरेको हो ।

खेलको ३२ औं मिनेटमा इडर मिलिटाओले गोल गर्दै रियललाई अग्रता दिलाएका थिए । पहिलो हाफ १-० मा सकिएको खेलमा दोस्रो हाफको ६६ औं मिनेटमा अल्कोयानोका डानिल भेगाले गोल गर्दै खेललाई बराबरीमा ल्याए । तर, खेलको खेलको ७६ औं मिनेटमा मार्को एसेन्सियोले गोल गर्दै रियललाई २-१ को अग्रता दिलाए । त्यसपछि खेलको ७८ औं मिनेटमा अल्कोयानोका जोसे जानले आत्मघाती गोल गरेपछि रियलले ३-१ को सहज जित दर्ता गर्यो । जितसँगै रियल मड्रिड कोपा डेल रे को अन्तिम १६ मा प्रवेश गरेको छ ।

त्यसैगरी बुधबार राति भएको राउण्ड अफ ३२ को खेलमा बार्सिलोनाले लिनारेस डिपोर्टिभोलाई २-१ ले पराजित गरेको छ । लिनारेसकोको घरेलु मैदानमा भएको निकै प्रतिस्पर्धात्मक खेलमा खेलको १९ औं मिनेटमा एन्टोनियो लुइज डियाजले गोल गर्दै घरेलु टोलीलाई अग्रता दिलाएका थिए । पहिलो हाफ १-० मा सकिएको खेलमा दोस्रो हाफमा बार्सिलोनाले २ गोल गर्यो ।

खेलको ६३ औं मिनेटमा बार्सिलोनाका ओसुमाने डेम्बेलेले गोल गर्दै खेललाई बराबरीमा ल्याए । त्यसपछि खेलको ६९ औं मिनेटमा फेरान जुट्ग्लाले गोल गर्दै बार्सिलोनालाई २-१ को जित दिलाए । जितसँगै बार्सिलोना कोपा डेल रे को अन्तिम १६ मा प्रवेश गरेको छ ।