इटालियन सिरि ए फुटबलमा युभेन्ट्सले रोमाञ्चक जित निकालेको छ । आइतबार राति भएको खेलमा रोमा युभेन्ट्ससँग ४-३ ले पराजित हुन पुग्यो ।

रोमाको घरेलु मैदानमा भएको निकै प्रतिस्पर्धात्मक खेलमा खेलको ११ औं मिनेटमा टमी अब्राहमको गोल गर्दै घरेलु टोलीलाई अग्रता दिलाएका थिए । तर, खेलको १८ औं मिनेटमा युभेन्ट्सका पाब्लो ड्याबालाले गोल गर्दै खेल बराबरीमा ल्याएका थिए । पहिलो हाफ १-१ को बराबरीमा सकिएको खेलमा दोस्रो हाफको ४८ औं मिनेटमा हेनरिख मखितारियानले गोल गर्दै रोमालाई २-१ को अग्रता दिलाए । त्यस्तै खेलको ५३ औं मिनेटमा लोरेन्जो पेलेग्रिनीले गोल मार्फत रोमा ३–१ ले अघि रह्यो ।

तर, खेलको ७० औं मिनेटमा युभेन्ट्सका म्यानुअल लोकाटेलीले गोल गर्दै खेललाई ३-२ को स्थितिमा ल्याए । त्यस्तै खेलको ७२ औं मिनेटमा देजान कुलुसेवस्कीले गोल गर्दै खेललाई ३-३ को बराबरीमा ल्याएका थिए । त्यसपछि खेलको ७७ औं मिनेटमा माटिया डि सिग्लियोले गोल गर्दै युभेन्ट्सलाई ४-३ को रोमाञ्चक जित दिलाए । त्यसअघि खेल सकिन ७ मिनेट अघि रोमाले प्राप्त पेनाल्टीमा गोल गर्न नसक्दा घरेलु टोली घरेलु मैदानमा पराजित हुन पुग्यो ।

जितसँगै युभेन्ट्स ३८ अंक सहित तालिकाको पाँचौ स्थानमा छ भने ३२ अंक जोडेको रोमा सातौं स्थानमा रहेको छ । त्यसैगरी इटालियन सिरि ए अन्तर्गत नै अन्य खेलमा खेलमा इन्टर मिलानले लाजियोलाई २–१ ले पराजित गर्दै शीर्ष स्थानमा उक्लिएको छ भने सालेर्निटानाले भिरोनालाई २–१ ले हरायो ।